VentureCraft BXD 流動解碼耳擴

text: Yesun | photo: Yesun | post on: 02-Oct-2014


之前係網上發現咗呢部 VentureCraft BXD 流動解碼耳擴,可以調整嘅地方相當之多,又唔貴,係發布會試嗰時,因為未調整得好,所以啲聲麻麻地,不過我好有信心,部機調好之後會又唔錯嘅表現,全日本做只係賣 $2999 所以都俾咗錢。


首先講吓呢部機有乜特別,主要有四樣,同軸數碼輸入、我更換Op Amp、平衡輸出同可調整阻抗黎配合唔同阻抗嘅耳機。


而家多數流動解碼耳擴,數碼輸入都係用USB,用同軸嘅唔多,一般情況用USB分析力較高,但係音樂感就同軸比較好。

可以換 Op Amp 嘅擴音機係非常之好玩嘅,每隻唔通型號嘅 Op Amp 聲音風格都唔一樣,所以換咗粒 Op Amp 好似換咗第二部擴咁。

平衡輸出,自從AK240 推出之後,平衡輸出係多咗人留意嘅,呢種輸出方式同非平衡相比,通常分析力會高少少,定位好少少, 空間闊少少,不過最後都係睇你鍾唔鍾意呢重囗味。

調整阻抗黎配合唔同阻抗嘅耳機,呢樣就係呢部機最強嘅地方,播放器同耳擴如果同耳機如果係唔夾嘅話,想好聲都難。好似AKG 3003 就係一隻阻抗低效率高但係電流又要夠先發揮得好嘅耳機。

大部份人加耳擴,都係因為手機或者播放器推力唔夠,不過呢兩年新出嘅播放器,大部分推力都唔錯,如果唔係用好大食嘅耳機,本身都夠力嘅。反而我覺得用耳擴黎改囗味同夾耳機更加重要。


紅圈係 HI GAIN 同 LO GAIN,黃圈係可以更換嘅 Op Amp,根機係 MUSES 8920,相入邊係已經比我換左做 MUSES 02,藍圈係數碼濾波方式設定,有 SHARP 同 SHORT 選擇,綠圈係啟動阻抗設定同可更換電阻板。

以上所有設定都係要用螺絲批拆開部幾先至可以改到,如果你有好多隻經常用而差異又大嘅耳機會比較麻煩。


部機係使用上有幾點要注意嘅,市面上係好難搵到兩頭3.5mm 嘅同軸線,平衡輸出係用同AK 240 一樣嘅2.5mm 四極頭,五組唔同阻抗嘅電阻板,雖然上高已經標明嗰阻抗,不過你最好都係試晒佢睇吓邊組最啱聽。


因為部機嗰平衡係2.5mm 四極頭,而我手上嘅平衡耳機線全部都係3.5mm 四極,冇理由改晒我手上啲線黎就佢架,唯有張部機個2.5mm 改做 3.5mm咁就一勞永逸啦!


仲有呢部機個3.5mm非平衡插口係用唔到有咪嘅耳機同四極平衡插,所以改開順手改埋。


我手上呢六部播放器,同軸輸出去 VentureCraft BXD,乾隆盛 QA360 分析力最好空間最大,Fiio X5 就音樂感最好,其他幾部就不過不失啦。


最後我張啲電阻板直接用金屬膜電阻代替同埋換咗粒金封混放,效果有幾好?咁你要聽過先至知啦!

advertisement
advertisement