乾隆盛 QLS QA350 MOD V2+

當年mp3播放器，受到電話挑戰嘅時候，大部份廠商竟然向多媒體發展，同電話鬥多媒體能力，到最後當然係失敗收場，但係喺呢個時候，大陸部份廠家，反而喺向高質素音樂播放器呢方面發展，結果打開咗一片新天地。

不過呢啲流動高質素音樂播放器，有一個共同點，就係成舊磚頭咁大，所以大家統稱呢啲國產磚頭播放器做(國磚)。


今次為大家介紹呢部國磚，係乾隆盛QLS QA350 MOD V2+，呢部機非常出名，點出名法?大家有冇諗過一部大陸機會顯示唔到中文，部機只可以播WAV，其他格式全部唔得，操作超簡單，不過佢嘅音質又真係相當唔錯，分析力高，推力又大，空間闊，立體感好。


部機可以當座枱機咁用，有齊Line out,同軸同光纖輸出。

仲有搖控添

呢部機係㷛嘅時候，發覺日日啲聲都有啲唔同，有時仲會有啲劣化，過咗兩百個鐘先開始穩定，不過國內論壇話，㷛到四百個鐘，又會有劣化情況，要去到五百個鐘先真正穩定，而且整體表現亦都有所提升，我依家只係煲咗兩百個鐘，等我㷛到五百個鐘再同大家報告。

點選相片集可看到更多相片。