超班平價耳機 VSONIC VSD1S

自從九年前，出現過一隻性價比相當高嘅低價耳機"漫步者H260"之後，高性價比嘅低價耳機就無乜邊隻特別出名，並唔係咁多年來，都再無平靚正嘅產品，只係呢類大陸耳機，多數都冇代理，就算有代理，都唔會大肆宣傳，因為一宣傳，加上廣告費之後，即時性價比大跌，而且隻產品出咗名之後，大家可能重會上淘寶買添。

2013年出現咗一隻性價比超級高嘅 VSONIC VSD1，官方係微博宣傳嘅時候，叫出咗一句口號，秒300，超600，平1000，講到咁犀利，都只係買199人民幣，通常大陸牌子嘅宣傳口號，都係聽過就算，不過之後我見到好多台灣網站嘅評價，都話呢隻野超班，咁就豪199人民幣俾佢，上淘寶買隻落嚟，聽吓係咪真係咁堅先。

呢隻耳機有兩個版本，VSD1同VSD1S，廠方話VSD1屬於高低頻比較突出。而VSD1S就比較平均，所以我買咗VSD1S。

個包裝盒好大個


以一隻低價耳機黎講，配件算相當多。

耳機上邊有張紙，叫大家揀個啱用嘅耳套同㷛返一百個鐘頭先，呢兩個提醒非常之好，因為我真係見過好多人係，開咗隻耳機之後，只要放得入隻耳，用到隻耳機壞都未試過用其他耳膠，所以最好係㷛完隻耳機之後，所有耳膠試一次，聽下邊隻最啱聽同帶得最舒服。


隻耳機外殼大部分都係塑膠，不過導管係金屬做，而最特別嘅地方係導管可以調校角度，校啱角度之後，的確係帶得相當舒服。


聲音方面係相當之平均，各方面表現真係超晒班，以$199人民幣嘅價錢，暫時可以話全無對手，只係差啱唔啱你口味，如果你係唔會買高價嘅耳機，最好搵機會聽下呢隻耳機先。

點選相片集可看到更多相片。